Tit 3 | MMX | STEP | La ne Taitas, una tong box i ri nom limixin nuunu do dina doxoma mumu lixitkis atdi maxopok at lagavaman mi lavaeme silok; la dinang tonga res at levelinga atdi la dina gagas kusu dina lok leven gugu nunuan;

Titus 3

Luruptuvuk At Limixin Nuunu

1 La ne Taitas, una tong box i ri nom limixin nuunu do dina doxoma mumu lixitkis atdi maxopok at lagavaman mi lavaeme silok; la dinang tonga res at levelinga atdi la dina gagas kusu dina lok leven gugu nunuan; 2 la di noxo paase xapmek mumu tara; ketla limila na nemen at lebelen di; dina balamu limixin; la dina lok ngangao ruturun at limixin axap, limixin nuunu la limixin bok maxamang at lotu.

3 Gano nedik limixin ta goxoklen lorooro avukat, ta goxo ronga res at levelinga at ne Moroa la levelinga bok at lavaeme silok. Satan ga xarang dik la tagara puse ri levempanga at na lavatbung menemen; la taga mumu mene nga lavavara atnedik. Lorooro atdik ga umsu mi laxakapmek mi levereven peves at lempanga at limixin petpes; la limixin diga musak dik la ta goxo epen avukat.

4 Ketla loklok nunuan la labalamu at ne Moroa, Laradi Loklox Arooro atdik ga rupot, 5 la neni ga lox arooro dik. Neni goxo lox arooro dik mumu leven gugu nunuan atdik; ketla neni ga balamu gamasa mun dik. Lebelemumu ren ni lavasuun at loklox arooro ren. Moroa ga lox arooro dik keretna; Loroonan Kaala ren ga gos kepe vam leveloklok kakapmek atdik la ga raba dik mi livipisik amaxat. 6 Moroa ga sak tiki Loroonan Kaala ren saparap dik kusu na lok tooro dik; i epovo xuren, mila ne Iesu Karisito, Laradi Loklox Arooro atdik, ga uu nop loklok atdik. 7 Kuren la ne Moroa ga lox asuusu letaba nabalamu ren tidik, la kerepmo diga tong i do nedik limixin mokmokso; la kerepmo nedik ta lok ngan laxamdak teren la dik tanaba ruuna ka lorooro avolo. 8 Na levelinga mumu loklox arooro at ne Moroa i ruturun; la una lolos ti tong asu amisix i ri limixin nuunu me Krit, kusu dina lolos ti lok leven gugu nunuan. Na leven gugu nunuan i lox avukat la i lok tooro limixin axap.

9 Ketla nemen uta vetep mi levelinga at levempanga gamasa. Na levelinga i lok ngan ta levenasen at lavalabat at lubungmixin me Judaia, la i lok ngan bok levelinga ik lok to xeneng at Lenavolo at ne Moses. Una ke na levempanga, mila na levempanga noxo lok tooro limixin nuunu. 10 Una vaase sok nege taradi i lok leven ekarakat. Do neni move na lox axis epeseves limixin, una vaase sok box i. Dola neni noxo ronga res at levelinga ram, una ke xepe i. 11 Una lox i xuren mila limixin kerepmo lodoxoma atdi i xaxarang arup di la lorooro atdi i umsu mi laxapmek. La mo laxapmek teren i lox asuusu i do levelinga bok teren i lok kapmek.

Levelinga Loklox Axap

12 Leventaba levelinga bok na, nenia ana tong i ru. Ana sak tiki ne Atemas kopla ne Tikikas saparav u. Dola neni na rupot, neni na lok kun u la una lolos ti vot pasa ia ro at lemenemen Nikopolis; nenia aba nemen go at leven gaaling at laavat.

13 La una lok tooro avukat ne Sinas, laradi likling at levelinga, eburu mi ne Apolos at lavatpas atdu. Una lok taba du mi levempanga duk pakes tin ti mo lavatpas. 14 La limixin axap atnedik, dina lolos amisik ti lok leven gugu nunuan kusu diba lox epovo lavakpakes atdi la diba lok tooro limixin petpes.

15 Nema eburu mi limixin nuunu dik lok de, ma lox aonon lavapaase momo ru. Una raba bok lavapaase momo atnema rinedi limixin di etangas minema xeneng at lunuunu atnedi.

Letaba nabalamu na nemen eburu minemi axap. I ruturun.